გაუქმებული ლიტერატურული პრემია 

ლიტერატურის ცნობილი კრიტიკოსები უკვე აკეთებენ საკმაოდ პესიმისტურ განცხადებებს. აჟიოტაჟის მიზეზი კი ის არის, რომ მხოლოდ სამწლიანი არსებობის მიუხედავად, ჯილდო საკმაოდ პრესტიჟულად მიიჩნეოდა და მას როგორც ბრიტანული "ბუკერის” ამერიკულ ალტრენატივას ისე განიხილავდნენ.

საქმე ისაა, რომ ჯილდოს დამაარსებელმა და ფინანსურმა მხარდამჭერმა კომპანია Reed Business Information-მა წლიური ბიუჯეტის შედგენისას არ გაითვალისწინა ლიტერატურული პრემიისთვის საჭირო ხარჯები და შედეგად The Quill Awards სპონსორის გარეშე დარჩა.

2005 წლიდან მოყოლებული The Quill Awards ჯილდოებს ცხრამეტ ნომინაციაში გასცემდა. მათ შორის პროზაული და პოეტური კრებულებისთვის, რომანებისა და ბიოგრაფიული ნაწარმოებებისთვის, ასევე აჯილდოვებდნენ ისტორიულ, პროფესიულ, სამეცნიერო და საბავშვო ნაწარმოებებს. ჯილდო მოიცავდა თანამედროვე ლიტერატურაში არსებულ ყველა ჟანრს – მათ შორის გრაფიკულ ნოველებსა და იუმორისტულ ნაკვესებსაც. რაც მთავარია, დაჯილდოების ცერემონიალი ყოველთვის ძალიან პომპეზური და საზეიმო იყო, რაც ჯილდოს მეტი პოპულარობისთვის კეთდებოდა. მას ხშირად ადარებდნენ ჰოლივუდურ საღამოებსაც, რადგან ნომინანტები წითელ ხალიჩასაც გადიოდნენ და ჯილდოს მისაღებად სცენაზე ოვაციების თანხლებით ადიოდნენ.

The Quill Awards-მა ხანმოკლე არსებობისას რამდენიმე ცნობილი თანამედროვე ავტორის დაჯილდოვება მოასწრო. 2005 წელს "წლის წიგნის” ნომინაციაში ჯოან როულინგმა გაიმარჯვა "ჰარი პოტერი და ნახევრად პრინცისთვის” ავტორობისთვის. ასევე დააჯილდოვეს ამ წიგნის ილუსტრატორი მერი გრანდპრი. როულინგის ნაწარმოებმა საბავშვო ლიტერატურის ნომინაციაშიც გაიმარჯვა. ამავე წელს პრიზი გადასცეს ბობ დილანსაც როგორც ავტობიოგრაფიული წიგნის "ქრონიკები, ტომი პირველი” ავტორს. იუმორისტული წიგნების კატეგორიაში კი მსახიობ ჯონ სტიუარტის სკეტჩების კრებულმა გაიმარჯვა. შეგახსენებთ, რომ სწორედ ჯონ სტიუარტს მიჰყავდა წლევანდელი "ოსკარის” დაჯილდოების საღამო. ჯილდო გადასცეს სტივენ კინგსაც, რომელმაც სტიუარტ ო`ნენთან ერთად ბეისბოლის გუნდის ბოსტონის "რედ სოქსის” შესახებ გამოსცა წიგნი.

2006 წელი ხმაურიანი სახელების მხრივ შედარებით მოკრძალებული იყო, თუმცა ამერიკის ყოფილი ვიცე-პრეზიდენტის, ელ გორისთვის მაინც მოიძებნა ადგილი, რომელმაც, ამ წელს პოლიტიკურ-ისტორიული ნაშრომი "საშინელი სიმართლე” გამოსცა. ეს სწორედ ის ნაწარმოებია, რომლის მიხედვითაც დევის გუგენჰაიმმა დოკუმენტური ფილმი გადაიღო და შესაბამის ნომინაციაში "ოსკარიც” მიიღო. ელ გორი ფილმში მთავარ როლსაც ასრულებს და მაყურებელს გლობალური დათბობისა და ბუნებრივი კატაკლიზმების საშიშროებაზე მოუთხრობს. ელ გორი The Quill Awards-ზე მომდევნო წელსაც გამოჩნდა და ამჯერად ასევე პოლიტიკური ნაშრომის The Assault on Reason-ის ავტორობისთვის დააჯილდოვეს.

დაიცა მარუსია უეჭველი მოხუცი მსუქანი ქალია ხო?????