ხელი ჩამკიდე. . .   მინდა, ერთად გავუჩინარდეთ,
მოვწყდეთ ამ ზანტი, უფერული სამყაროს კიდეს!
ხელი ჩამკიდე. . .   და ნუ ცდილობ, რომ მიმატოვო,
თორემ ჩვენს შორის ფესვს გაიდგამს უხეში სივრცე.
ხელი ჩამკიდე. . .  და დაღლილი ჩვენი  სხეულით
მომავალ დღეებს შევერწყმებით დაუფიქრებლად,
ხელი ჩამკიდე. . .  მივცეთ სულებს თავისუფლება
და ერთმანეთის ტკივილების ვცადოთ გაგება.
ხელი ჩამკიდე. . .  ბილიკებად დავყოთ ცხოვრება
და მერე ისევ ერთად ვცადოთ მასზე ბიჯება,
ხელი ჩამკიდე. . .  უფერო და უმიზნო სივრცე
გავაფერადოთ, ერთი ფუნჯით მოვხატოთ იქნებ. . .
ხელი ჩამკიდე. . .  არ ვიფიქროთ, არ ვიაზროვნოთ
და იქნებ ამით მივაღწიოთ ჩვენ მიუღწეველს,
ხელი ჩამკიდე. . .  გულის სიმებს ავყვეთ რითმებად,
მოვწყდეთ ამ ზანტი, უფერული სამყაროს კიდეს!. . .